أحلام واحد مصرى ............................................................... د. حسن فريد ...................... لو كنت أميرا من أمراء ألف ليلة و ليلة : كنت أركب عدادات تجارية بلا دعم فى أسعارها للكهرباء و المياه و الغاز فى كل مصانع و شقق و فيلات و قصور الناس المبسوطين. كنت أسلم كل مواطن شريف من غير فلوس قطعة أرض فى الصحراء مساحتها 1000 متر كاملة المرافق و أشترط عليه يدينا 7% منها بعد بنائها. كنت أمنع اهداء لواءات و عمداء الجيش و الشرطة اصحاب الحظوة و المحالين للمعاش وظائف فى المحليات و مستشارين فى الوزارات و المصالح الحكومية و كفاية عليهم معاشاتهم المرتفعة و الألوف اللى بيصرفوها مع خروجهم للمعاش من الصناديق التابعة لعملهم و كنت أفصل العاملين منهم حاليا علشان فيه ملايين مستحقين بدلا منهم هذه الوظائف و الدرجات. كنت خفضت رواتب و بدلات و مستحقات رجال الدولة من الرئيس الى رئيس الوزراء و كبار رجال الدولة و أعضاء مجلسى الشعب و الشورى و المستشارين 50%. كنت لغيت الأمن المركزى و وزعت رجاله و ميزايته و مصاريفه على تخصصات الشرطة المختلفة لتحقيق الأمن الحقيقى للناس موش الأمن السياسى. كنت عملت المحافظين بالانتخاب و كل محافظ له سلطات رئيس الدولة فى محافظته و له ميزانيته الخاصة و له موارده و عليه مصاريفه. كنت عملت حكومة فيدراليه تشرف على كل الدولة من رجال سياسة حقيقيين موش رجال أعمال يقدروا على مصانعهم و مشروعاتهم لكن لا يمكن يقدروا على ادارة دولة. كنت أشركت الشعب كله فى وضع دستور جديد و أشيل من بالى حكاية التوريث اللى مضيعة كل حاجة. كنت عملت وزارة لتنمية الثروة السمكية (2000كيلو شواطئ ونهر النيل) و استعنت بدول شرق آسيا و الدول الإسكندنافيه لجعل بروتين الأسماك نمرة واحد فى البلد بدل تربية المواشى على برسيم يستهلك أغلب الأرض الزراعية . كنت أنشأت مجموعة عمل من خبرات و علماء مصر الحقيقيين لعمل مشروع قومى لزراعة مليون فدان قمح بمياه البحر فى سيناء و جندت له كل امكانيات الشباب و رجال الأعمال المخلصين و خبرة و مهمات القوات المسلحة. كنت رجعت قداسة نهر النيل و ناديت على شباب البلد ينظفوه و يطهروه و يبقى لأجيال و أجيال قادمة. كنت وفرت الملايين اللى بتصرف على الآثار من متاحف و أسوار و تنسيق و طرحت هذه المشروعات على رجال الأعمال ينفذوها و ياخدوا ربحها أنا اللى كسبان هى الآثار حتروح فين و كفاية مصانع حديد مسلح و أسمنت و سيراميك و تجميع سيارات. كنت و كنت و كنت ......... اللهم اجعله خير أنا كنت بحلم .... ولا ده كابوس
	.....................................................................................